RDO Ramesh Rathore’s birthday was celebrated in a special way in Hanamkonda
ہنمکنڈہ میں آر ڈی او رمیش راٹھور کا یومِ پیدائش خصوصی انداز میں منایا گیا
حیدرآباد/ہنمکنڈہ:-4/اپریل
(دستور نیوز ڈاٹ کام)
انوراگ ہیلپنگ سوسائٹی کی چیئرپرسن ڈاکٹر انیتا ریڈی کی زیرِ صدارت، آج ہنمکنڈہ کے آر ڈی او رمیش راٹھور کا یومِ پیدائش اسپندن ادارہ برائے ذہنی و سماعتی معذور بچوں کے آشرم میں منایا گیا۔
اس موقع پر سب سے پہلے بچوں کے ساتھ مل کر کیک کاٹا گیا اور بعد ازاں بچوں میں مفید کتابیں، پھل اور مٹھائیاں تقسیم کی گئیں۔
جناب رمیش راٹھور نے اس موقع پر اظہارِ خیال کرتے ہوئے کہا کہ ’’میری سالگرہ ان معصوم اور معذور بچوں کے درمیان منانا میرے لیے باعثِ مسرت ہے۔ میں اپنی جانب سے ان کی فلاح و بہبود کے لیے ہر ممکن مدد فراہم کرتا رہوں گا۔ انسانی خدمت ہی اصل عبادت ہے، ہر فرد کو ان بچوں کے ساتھ محبت اور خلوص سے پیش آنا چاہیے۔‘‘
اس موقع پر سینیئر سٹیزنز ٹربیونل کورٹ کی رکن اور انوراگ ہیلپنگ سوسائٹی کی چیئرپرسن ڈاکٹر انیتا ریڈی نے کہا کہ ’’حکومتی عہدے داروں کا یوں اپنی سالگرہ اور اہم دن معذور و یتیم بچوں کے ساتھ منانا واقعی قابلِ ستائش ہے۔ معذور بچوں کی خدمت دراصل خدا کی خوشنودگی کے مترادف ہے۔ اگر ہر شخص ان بچوں کے ساتھ محبت سے پیش آئے تو انہیں یہ احساس ہوگا کہ وہ تنہا نہیں ہیں۔‘‘
پروگرام کے دوران بچوں نے کھیلوں اور گیتوں کے ذریعے حاضرین کو محظوظ کیا۔
اس تقریب میں جناب رمیش راٹھور، ڈاکٹر انیتا ریڈی، اسپندن آشرم کی منتظمہ سچریتا، ہریتھا، الیکھیا، بھارگوِی سمیت دیگر معزز افراد نے شرکت کی۔
