عوامی حکومت کے تحت کسانوں کے قرض کی معافی ملک کی تاریخ میں ایک ریکارڈ ہے۔
تلنگانہ کے کسانوں کے تئیں کانگریس کے اخلاص کا ثبوت ہے۔چیف منسٹر ریونت ریڈی
حیدرآباد:-30/جولائی
(دستور نیوز ڈاٹ کام)
چیف منسٹر ریونت ریڈی نے کہا کہ تلنگانہ کی عوامی حکومت نے کسانوں کے قرضوں کو بڑی تعداد میں معاف کرکے ایک ایسا ریکارڈ قائم کیا ہے جو آزاد ہندوستان کی تاریخ میں اب تک کوئی اور ریاست نہیں کرسکی ہے۔
وزیر اعلیٰ نے اعلان کیا کہ پہلے مرحلے میں 1 لاکھ روپے اور دوسرے مرحلے میں 1.50 لاکھ روپے سے کم کے قرضوں کی معافی کے تحت 12 دنوں کے اندر لاکھوں کسانوں کے کھاتوں میں 12,224 کروڑ روپے جمع کرائے گئے ہیں۔ وزیر اعلیٰ نے منگل کو قانون ساز اسمبلی کے احاطے میں کسانوں کو قرض معافی کی دوسری قسط کا چیک حوالے کیا۔ ریاست بھر کے کسانوں کے کھاتوں میں قرض معافی کی رقم جمع کرنے کا عمل آج دوپہر 12 بجے سے شروع ہو گیا ہے۔
وزیر اعلیٰ نے کہا کہ وعدے کے مطابق تیسری قسط اگست میں مکمل ہو جائے گی اور 31 ہزار کروڑ روپے کی قرض معافی کا عمل مکمل ہو جائے گا۔ چیف منسٹر نے کہا کہ ملک کی تاریخ میں کسی بھی ریاست نے اتنی کم مدت میں کسانوں کے اتنے بڑے قرضے معاف نہیں کئے ہیں اور تلنگانہ کی عوامی حکومت کو یہ اعزاز حاصل کرنے پر فخر ہے۔
