CPI Has a Century-Long History of Struggle on Public Issues: State Assistant Secretary Takkalapalli Srinivas Rao
سی پی آئی کی سو سالہ قربانیوں کی تاریخ بے مثال ہے: تکلا پلی سرینواس راؤ
حیدرآباد/ورنگل:
(دستور نیوز ڈاٹ کام)
سی پی آئی ریاستی معاون سکریٹری تکلا پلی سرینواس راؤ نے کہا کہ ملک میں عوامی مسائل پر جدوجہد کی سو سالہ قربانیوں کی تاریخ رکھنے والی واحد سیاسی جماعت سی پی آئی ہے۔ انہوں نے ہفتہ کے روز ورنگل کے شیو نگر واقع تَمّیرا بھون میں 18 جنوری کو کھمم میں منعقد ہونے والے سی پی آئی صد سالہ تقریبات کے اختتامی قومی جلسۂ عام کے موقع پر شائع کیے گئے دیواری پوسٹروں کی رسمِ اجرا انجام دی۔
اس موقع پر خطاب کرتے ہوئے تکلا پلی سرینواس راؤ نے عوام سے اپیل کی کہ وہ 18 جنوری کو کھمم میں منعقد ہونے والے عظیم الشان عوامی جلسۂ عام میں بڑی تعداد میں شرکت کر کے سی پی آئی کی صد سالہ تقریبات کو کامیاب بنائیں۔ انہوں نے کہا کہ قومی جمہوری انقلاب کے مقصد، سوشلسٹ نظریے، سماجی انصاف، سیکولرازم اور جمہوریت کے تحفظ کی جدوجہد میں سی پی آئی نے ہمیشہ کلیدی کردار ادا کیا ہے۔
انہوں نے کہا کہ آزادیٔ ہند کی تحریک میں سی پی آئی نے بے شمار قربانیاں دیں اور کئی شہداء پیش کیے۔ کسانوں اور غریبوں کے حق میں جدوجہد کرتے ہوئے “جس نے جوتا، اسی کی زمین” کے نعرے کے تحت لاکھوں ایکڑ اراضی بے زمین غریبوں میں تقسیم کی گئی۔ نیز نظام کی آمرانہ حکومت کے خلاف مسلح کسان تحریک چلا کر ہزاروں دیہات کو آزادی دلانے کی شاندار تاریخ بھی صرف سی پی آئی کے حصے میں آئی ہے۔
انہوں نے کہا کہ ملک میں بائیں بازو کی جماعتوں کی یکجہتی کو مضبوط کرتے ہوئے سیکولر جمہوری قوتوں کو متحد کیا جا رہا ہے تاکہ عوامی جدوجہد کو مزید تقویت دی جا سکے۔ انہوں نے الزام عائد کیا کہ بی جے پی حب الوطنی کے نام پر ملک کی دولت کارپوریٹ طبقے کے حوالے کر رہی ہے۔ اراؤلی پہاڑی سلسلے کو ادانی مائننگ کمپنی کے حوالے کرنے پر بھی انہوں نے شدید تنقید کی۔
تکلا پلی سرینواس راؤ نے کہا کہ مودی حکومت کے اقتدار میں آنے کے بعد غربت اور بے روزگاری میں دوگنا اضافہ ہوا ہے، جبکہ بے گھر غریبوں کی تعداد میں بھی اضافہ ہوا ہے۔ ان کا کہنا تھا کہ وزیر اعظم کی توجہ صرف کارپوریٹ طاقتوں پر مرکوز ہے اور غریبوں کی فلاح و بہبود کو نظر انداز کیا جا رہا ہے۔
انہوں نے مرکزی وزیر داخلہ امت شاہ کی جانب سے گزشتہ 50 برسوں کے عوامی احتجاجی تحریکوں پر رپورٹ تیار کرنے کی ہدایت کو عوامی تحریکوں کو دبانے کی منظم کوشش قرار دیا اور کہا کہ یہ عوام کے بنیادی حقوق سلب کرنے کے مترادف ہے۔ انہوں نے مطالبہ کیا کہ عوامی تحریکوں کے خلاف جبر و استبداد فوری طور پر بند کیا جائے۔
اس پروگرام میں سی پی آئی ورنگل ضلع سکریٹری شیخ باش میاں، ریاستی کمیٹی کے ارکان میکل روی، پنجال رمیش، ضلع قائدین پناسا پرساد، گناراپو رمیش، بوسا رویندر، گنڈے بدری، تالاپلی راہیلا، اُرسی راجو، تالاپلی جان پال، اے آئی ایس ایف قائدین لادل شرتھ، دِڈّی پارتھ سارتھی اور دیگر شریک تھے۔
دستور نیوز ڈاٹ کام
