Students and Youth Must Stay Alert Against Cyber Crimes: Cyber Crime Police
طلبہ اور نوجوان سائبر جرائم سے ہوشیار رہیں: سائبر کرائم پولیس
ہنمکنڈہ: 19/اگست
(دستورنیوز)
عوام، طلبہ اور نوجوانوں میں سائبر جرائم کے بارے میں شعور بیدار کرنے کے مقصد سے ’’سورکشا کا ترنگا‘‘ پروگرام کے تحت کاکتیہ یونیورسٹی انجینئرنگ کالج میں سائبر کرائم آگاہی پروگرام منعقد کیا گیا۔ پروگرام میں تقریباً 200 طلبہ، ورکنگ پروفیشنلز اور دیگر افراد نے شرکت کی۔
اس موقع پر پولیس عہدیداروں نے سائبر جرائم پیشہ افراد کی جانب سے اختیار کیے جانے والے نئے اور دھوکہ دہی پر مبنی طریقوں کے بارے میں تفصیلی آگاہی فراہم کی۔ خاص طور پر ڈیجیٹل اریسٹ فراڈ، انویسٹمنٹ فراڈ، ریموٹ ایکسس ایپ فراڈ اور بینک/KYC اپ ڈیٹ فراڈ کے طریقۂ واردات سے شرکاء کو واقف کرایا گیا۔
پولیس نے بتایا کہ ڈیجیٹل اریسٹ فراڈ میں سائبر مجرم خود کو پولیس یا کسی سرکاری ادارے کا افسر ظاہر کرتے ہوئے متاثرین کو کسی مقدمے میں پھنسنے کا خوف دلاتے ہیں اور رقم کا مطالبہ کرتے ہیں۔ اسی طرح انویسٹمنٹ فراڈ میں کم مدت میں زیادہ منافع کا لالچ دے کر جعلی سرمایہ کاری اسکیموں کے ذریعے لوگوں سے رقم ہتھیائی جاتی ہے۔
ریموٹ ایکسس ایپ فراڈ کے بارے میں بتایا گیا کہ مشتبہ ایپس انسٹال کروانے کے بعد مجرم موبائل فون اور بینک اکاؤنٹس تک رسائی حاصل کرنے کی کوشش کرتے ہیں۔ جبکہ بینک/KYC اپ ڈیٹ فراڈ میں KYC کی تجدید کے نام پر ذاتی معلومات، بینکنگ تفصیلات اور OTP حاصل کرکے دھوکہ دہی کی جاتی ہے۔
پولیس نے عوام اور طلبہ کو مشورہ دیا کہ وہ کسی بھی نامعلوم شخص کے ساتھ اپنی ذاتی یا بینکنگ معلومات ہرگز شیئر نہ کریں۔ مشتبہ فون کالز اور پیغامات کا جواب دینے سے پہلے ان کی صداقت کی لازماً تصدیق کریں اور نامعلوم یا مشتبہ لنکس پر کلک کرنے سے گریز کریں۔
پولیس نے واضح کیا کہ OTP، PIN، CVV، پاس ورڈ اور دیگر خفیہ بینکنگ تفصیلات کسی کے ساتھ شیئر نہیں کرنی چاہئیں۔ پولیس، بینک یا سرکاری اداروں کے عہدیدار فون پر OTP یا خفیہ بینکنگ معلومات طلب نہیں کرتے۔
پولیس نے کہا کہ اگر کوئی شخص سائبر فراڈ کا شکار ہوجائے تو بغیر کسی تاخیر کے 1930 سائبر کرائم ہیلپ لائن پر رابطہ کرے یا cybercrime.gov.in پر شکایت درج کرے۔ انہوں نے بتایا کہ سائبر فراڈ کی اطلاع جتنی جلد دی جائے گی، مشتبہ مالی لین دین کو روکنے کے امکانات اتنے ہی زیادہ ہوں گے۔
بعد ازاں شرکاء میں سائبر سکیورٹی کے بارے میں مزید شعور پیدا کرنے کے مقصد سے سائبر آگاہی کوئز بھی منعقد کیا گیا۔
اس پروگرام میں SHO ایم. وینکٹ رمن، CI KUC روی کمار، SI شراونی، SI چرن، ہیڈ کانسٹیبل پی. سرینواس، کانسٹیبل زاہورالدین کے علاوہ SPARC کلب کے اراکین نے شرکت کی۔
