CPI Condemns Forceful Ending of Sonam Wangchuk’s Hunger Strike, Demands Democratic Rights
سونم وانگچک کی بھوک ہڑتال ختم کرانا غیر جمہوری اقدام، بی جے پی حکومت عوامی تحریک کو کچلنا چاہتی ہے: سی پی آئی
حیدرآباد، 18 جولائی:
(دستور نیوز)
کمیونسٹ پارٹی آف انڈیا (سی پی آئی) تلنگانہ کے ریاستی معاون سکریٹری تکّلپلی سرینواس راؤ نے سماجی کارکن سونم وانگچک کی بھوک ہڑتال کو پولیس کی جانب سے زبردستی ختم کرانے کی شدید مذمت کرتے ہوئے اسے غیر جمہوری اور آمرانہ اقدام قرار دیا ہے۔
اپنے ایک بیان میں انہوں نے کہا کہ سونم وانگچک عوامی مسائل، تعلیمی نظام کی خامیوں اور لداخ کے عوام کے حقوق کے تحفظ کے لیے پرامن اور جمہوری انداز میں احتجاج کر رہے تھے، لیکن مرکزی حکومت نے ان کے مطالبات پر غور کرنے کے بجائے ان کی بھوک ہڑتال ختم کرا کر اپنی غیر جمہوری سوچ کا مظاہرہ کیا ہے۔
انہوں نے الزام عائد کیا کہ بی جے پی حکومت عوامی اور طلبہ تحریکوں کو دبانے کی کوشش کر رہی ہے۔ انہوں نے کہا کہ سونم وانگچک کی جانب سے اٹھائے گئے مسائل صرف ایک فرد کے نہیں بلکہ ملک کے مستقبل اور تعلیمی نظام سے وابستہ ہیں، اس لیے سی پی آئی ان کی جدوجہد کی مکمل حمایت کرتی ہے۔
تکّلپلی سرینواس راؤ نے کہا کہ دہلی پولیس، دہلی ہائی کورٹ کے احکامات کی غلط تشریح نہیں کر سکتی۔ عدالت نے صرف سونم وانگچک کی صحت کی نگرانی کی ہدایت دی تھی، انہیں ان کی مرضی کے خلاف احتجاجی مقام سے ہٹانے کا کوئی حکم نہیں دیا تھا۔
انہوں نے کہا کہ دہلی پولیس کمشنر کی اچانک تبدیلی اور اس کے بعد پرامن احتجاج کے خلاف کارروائی سے یہ شبہ مضبوط ہوتا ہے کہ حکومت 20 جولائی کو پارلیمنٹ کی جانب مجوزہ مارچ کو ناکام بنانے اور طلبہ تحریک کو دبانے کی کوشش کر رہی ہے۔
سی پی آئی رہنما نے حکومت سے مطالبہ کیا کہ وہ فوری طور پر جبر و استبداد کی پالیسی ترک کرے، پرامن احتجاج کرنے والوں کے جمہوری حقوق اور تحفظ کو یقینی بنائے اور طلبہ و احتجاجی نمائندوں سے بامعنی مذاکرات کرے۔
انہوں نے مزید مطالبہ کیا کہ نیٹ (NEET) امتحانات میں پیپر لیک اور امتحانی نظام کی ناکامی کی اخلاقی ذمہ داری قبول کرتے ہوئے مرکزی وزیر تعلیم دھرمیندر پردھان فوری طور پر اپنے عہدے سے استعفیٰ دیں۔
دستور نیوز
