Saddened by the death of Muhammad Ibrahim in America
امریکہ میں محمد ابراہیم صاحب کا انتقال پر ملا ل
حیدرآباد/ورنگل:-25/جون
(دستور نیوز ڈاٹ کام)
ایک مخلص، فعال اور مثالی سماجی رہنمامرحوم محمد ابراہیم صاحب، سابقہ صدر مسلم ویلفیئر سوسائٹی ورنگل، کا حال ہی میں امریکہ میں انتقال ایک ناقابل تلافی نقصان ہے۔ ان کی وفات نہ صرف ورنگل بلکہ پوری تلنگانہ ریاست کے لیے ایک بڑا صدمہ ہے۔ مرحوم ایک ایسے شخصیت تھے جو خاموشی، خلوص، استقامت اور خدمت خلق کا بہترین نمونہ تھے۔
مرحوم محمد ابراہیم صاحب نے مسلم ویلفیئر سوسائٹی کے پلیٹ فارم سے برسوں تک قوم و ملت کی خدمت کی۔ تعلیمی میدان ہو یا فلاحی سرگرمیاں، رفاہی مہمات ہوں یا دینی خدمات، ہر شعبے میں انہوں نے اپنا گراں قدر کردار ادا کیا۔ ان کی قیادت میں سوسائٹی نے کئی تعلیمی ادارے، یتیم بچوں کے لیے کفالت کے منصوبے، اور صحت و صفائی سے متعلق پروگرامز چلائے۔ وہ ہمیشہ کوشش کرتے رہے کہ محروم طبقات کو بھی وہی مواقع میسر آئیں جو سماج کے خوشحال طبقے کو حاصل ہیں۔ان کی شخصیت میں سب سے نمایاں پہلو ان کی سادگی، ملنساری اور بے لوث جذبۂ خدمت تھا۔ وہ ہمیشہ قوم کی بہتری کے لیے فکر مند رہتے اور نئے منصوبے پیش کرنے میں پیش پیش رہتے تھے۔ دینی، تعلیمی و سماجی اداروں کی سرپرستی اور ان کی ترقی کے لیے وہ ہمہ وقت مصروف عمل رہتے۔ مرحوم محمد ابراہیم صاحب کا انتقال ایک خلا ہے جو طویل عرصے تک پُر نہیں ہو سکے گا۔ ان کے انتقال سے تلنگانہ کی ملی، سماجی و دینی تحریکوں کو جو دھچکہ لگا ہے، اس کا اندازہ ان کے کاموں، خدمات اور عوامی مقبولیت سے لگایا جا سکتا ہے۔ہم دعا گو ہیں کہ اللہ تعالیٰ مرحوم کو جنت الفردوس میں اعلیٰ مقام عطا فرمائے، ان کی مغفرت فرمائے اور لواحقین و متعلقین کو صبر جمیل عطا کرے۔ آمین۔ان کی زندگی ہم سب کے لیے ایک نمونہ ہے کہ کس طرح خلوص دل سے کام کیا جائے اور کس طرح انسانیت کی خدمت کو اپنا مشن بنایا جائے۔
مسلم ویلفیئر سوسائٹی ورنگل کے علاوہ شہر ورنگل و ہنمکنڈہ کے مختلف سیاسی و سماجی احباب نے محمد ابراہیم کے سانحۂ ارتحال پر سوسائٹی کے عہدیداران و اراکین نے تعزیت پیش کی ، ممبران نے مرحوم کی ملی، سماجی و فلاحی خدمات کو خراجِ عقیدت پیش کرتے ہوئے ان کے افرادِ خاندان سے تعزیت کی اور مرحوم کی مغفرت و بلندئ درجات کے لیے دعا کی جس میں جناب محمد سراج احمد ، محمد قادر محی الدین، ایڈوکیٹ ابوبکر، محمد اکبر ضیا، تلگو صحافی محمد جعفر ، محمد افتخار، محمد رؤف خان عارف، محمد خیر الناصرین ، سید عبدالمجید محمد عبدالکلیم ، محمد سلیم احمد ، خواجہ عبدالرحیم الدین ، مرزا چشتی حسن، عبدالجلیل خان، محمد محمود علی، سفدر بابا، مرزا فتح اللہ بیگ ریاض، کرم علی خان، جناب محمد اعجاز احمد، خواجہ معین الدین اختر شامل ہیں
