AIYF Vows Continued Struggle for Filling Vacancies and Ending Contract & Outsourcing System
خالی آسامیوں کو پُر کرنے اور کنٹریکٹ و آؤٹ سورسنگ نظام کے خاتمے تک جدوجہد جاری رہے گی: ڈاکٹر سید ولی اللہ قادری
دستور نیوز ڈاٹ کام :
ریاست تلنگانہ میں خالی سرکاری آسامیوں کو فوری طور پر پُر کرنے، کنٹریکٹ و آؤٹ سورسنگ نظام کے خاتمے اور سرکاری تعلیمی شعبے کو مضبوط بنانے کے مطالبے کے ساتھ آل انڈیا یوتھ فیڈریشن (اے آئی وائی ایف) ضلع ورنگل کمیٹی نے ریاستی کمیٹی کی اپیل پر ایڈیشنل کلکٹر جناب وائی۔ وی۔ گنیش، آئی اے ایس، کو ایک یادداشت پیش کی۔
اس موقع پر خطاب کرتے ہوئے اے آئی وائی ایف تلنگانہ ریاستی صدر ڈاکٹر سید ولی اللہ قادری نے کہا کہ ریاست میں لاکھوں بے روزگار نوجوان روزگار کے منتظر ہیں جبکہ مختلف سرکاری محکموں میں ہزاروں آسامیاں خالی پڑی ہوئی ہیں۔ انہوں نے کہا کہ سرکاری دفاتر، اسکولوں، کالجوں اور اسپتالوں میں عملے کی شدید قلت پائی جاتی ہے، لیکن حکومت خالی آسامیوں کی مکمل تفصیلات جاری کرنے اور بھرتی کے عمل کو تیز کرنے کے بجائے ٹال مٹول سے کام لے رہی ہے۔
ڈاکٹر قادری نے کہا کہ مستقل سرکاری ملازمتوں کے بجائے کنٹریکٹ اور آؤٹ سورسنگ نظام کو فروغ دیا جا رہا ہے، جس کے نتیجے میں نوجوان ملازمت کے تحفظ سے محروم ہو رہے ہیں۔ انہوں نے اس رجحان کو بے روزگار نوجوانوں کے ساتھ ناانصافی قرار دیتے ہوئے کہا کہ اس سے عوامی خدمات کا معیار بھی متاثر ہو رہا ہے۔
انہوں نے سرکاری تعلیمی شعبے کی ابتر صورتحال پر تشویش کا اظہار کرتے ہوئے کہا کہ اساتذہ کی خالی آسامیاں، بنیادی سہولیات کی کمی اور فنڈز کے فقدان کے باعث سرکاری تعلیم شدید بحران سے دوچار ہے۔ دوسری جانب نجی اور کارپوریٹ تعلیمی ادارے بھاری فیسوں کے ذریعے طلبہ اور والدین کا استحصال کر رہے ہیں جبکہ حکومت فیس ریگولیشن قانون پر مؤثر عمل درآمد کرانے میں ناکام ثابت ہوئی ہے۔
اے آئی وائی ایف نے حکومت سے مطالبہ کیا کہ تمام سرکاری محکموں میں خالی آسامیوں پر وائٹ پیپر جاری کیا جائے، تمام خالی ملازمتوں کو فوری طور پر پُر کیا جائے، کنٹریکٹ و آؤٹ سورسنگ نظام کو ختم کرکے مستقل تقرریاں عمل میں لائی جائیں، ٹی جی پی ایس سی کے ذریعے سالانہ بھرتی کیلنڈر جاری کیا جائے، سرکاری تعلیمی شعبے کو مضبوط بنایا جائے، اساتذہ، لیکچررز اور طبی عملے کی خالی آسامیوں کو پُر کیا جائے اور نجی و کارپوریٹ تعلیمی اداروں کی من مانیوں کو روکنے کے لیے فیس ریگولیشن قانون پر سختی سے عمل درآمد کیا جائے۔
یادداشت پیش کرنے کے پروگرام میں اے آئی وائی ایف ضلع ورنگل کے سیکریٹری مسکا سدھیر، رہنما جگدیش اور دیگر کارکنان نے بھی شرکت کی۔
دستور نیوز ڈاٹ کام
