CPI Demands Abolition of NEET, Seeks Restoration of States’ Right to Conduct Entrance Exams
نیٹ امتحان ختم کرکے داخلہ امتحانات کا اختیار ریاستوں کو دیا جائے: سی پی آئی کا مطالبہ
ہنمکنڈہ:27/جولائی
(دستور نیوز)
کمیونسٹ پارٹی آف انڈیا (سی پی آئی) کے ریاستی معاون سکریٹری تکّلپلی سرینواس راؤ نے مطالبہ کیا ہے کہ نیٹ (NEET) جیسے مرکزی داخلہ امتحانات کو مکمل طور پر ختم کرکے ریاستوں کو ان کے حالات اور ضروریات کے مطابق داخلہ امتحانات منعقد کرنے کا اختیار دیا جائے۔ انہوں نے کہا کہ تعلیم کو وفاقی نظام کے تقاضوں کے مطابق ریاستوں کا بنیادی حق تسلیم کیا جانا چاہیے۔
نیٹ پرچہ لیک ہونے کے باعث جان گنوانے والے طلبہ کو خراجِ عقیدت پیش کرنے کے لیے سی پی آئی ضلع ہنمکنڈہ کمیٹی کے زیرِ اہتمام پیر کی شب ہنمکنڈہ کے کالوجی سنٹر پر شمع بردار (کینڈل لائٹ) ریلی نکالی گئی، جس میں پارٹی قائدین اور کارکنوں نے شرکت کرتے ہوئے متاثرہ طلبہ کو خراجِ عقیدت پیش کیا۔
اس موقع پر خطاب کرتے ہوئے تکّلپلی سرینواس راؤ نے کہا کہ مرکزی وزیرِ تعلیم دھرمیندر پردھان کا استعفیٰ ملک بھر میں طلبہ اور نوجوانوں کی متحدہ جدوجہد کی کامیابی کا ثبوت ہے۔ انہوں نے الزام عائد کیا کہ نیٹ پرچہ لیک، سی بی ایس ای کی جانچ کے نظام میں ناکامی، سی یو ای ٹی امتحانات میں این ٹی اے کی بدانتظامی اور تعلیم کے شعبہ میں مرکزیت کے خلاف ملک گیر احتجاج کو مرکزی حکومت نے سخت دباؤ اور طاقت کے ذریعے کچلنے کی کوشش کی۔
انہوں نے کہا کہ دہلی پارلیمنٹ مارچ کے دوران پُرامن احتجاج کرنے والے طلبہ پر لاٹھی چارج، آنسو گیس اور پیلٹ حملے کیے گئے، تاہم طلبہ اور نوجوانوں نے ان تمام رکاوٹوں کا بہادری سے مقابلہ کرتے ہوئے اپنی تحریک کو کامیاب بنایا۔
سرینواس راؤ نے واضح کیا کہ صرف مرکزی وزیرِ تعلیم کے استعفیٰ سے جدوجہد ختم نہیں ہوتی بلکہ ملک کے تعلیمی نظام کے تحفظ کے لیے تعلیمی مرکزیت کی پالیسیوں کو واپس لینے، نیشنل ٹیسٹنگ ایجنسی (NTA) کو ختم کرنے اور قومی تعلیمی پالیسی (NEP-2020) کو منسوخ کرنے تک تحریک کو مزید وسیع پیمانے پر جاری رکھنا ہوگا۔
اس پروگرام میں سی پی آئی ضلع سکریٹری کرّے بھکشپتی، ضلع معاون سکریٹریز توتا بھکشپتی اور مددیلا ایلیش، ہنمکنڈہ منڈل سکریٹری اشوک اسٹالن، قائدین ایدونوری وینکٹ راجم، کوٹے پاکا روی، گنتی راجیندر، مالوت منگ سمیت دیگر نے شرکت کی۔
dastoornews
