Hanumakonda Collector Chahat Bajpai Inaugurates Telangana Tourism Mobile Museum
ہنمکنڈہ کلکٹر چاہت باجپائی نے تلنگانہ ٹورازم موبائل میوزیم کا افتتاح کیا
ہنمکنڈہ، 14 مئی:
(دستور نیوز ڈا ٹ کام)
تلنگانہ ریاستی حکومت کی جانب سے جاری 99 روزہ عوامی حکمرانی و ترقیاتی منصوبہ کے تحت محکمہ سیاحت تلنگانہ کے زیرِ اہتمام قائم کردہ ’’تلنگانہ ٹورازم موبائل میوزیم‘‘ کا افتتاح ہنمکنڈہ ضلع کلکٹر چاہت باجپائی نے جمعرات کے روز کیا۔
کلکٹریٹ ہنمکنڈہ کے احاطہ میں قائم اس موبائل میوزیم کو تین دنوں تک عوام کے لیے دستیاب رکھا جائے گا۔ حکام کے مطابق میوزیم میں تلنگانہ ریاست کے مشہور سیاحتی مقامات کی خوبصورت تصاویر، خصوصی نمائشیں اور معلوماتی مواد عوام کی توجہ کا مرکز بنے ہوئے ہیں۔
میوزیم میں سیاحتی مقامات کی اہمیت، تاریخی پس منظر، دورہ سے متعلق تفصیلات، بروشرس اور معلوماتی کتابچے بھی فراہم کیے گئے ہیں تاکہ عوام میں سیاحت کے تئیں شعور بیدار کیا جا سکے۔
اس موقع پر ضلع کلکٹر چاہت باجپائی نے کہا کہ ریاست کے سیاحتی مقامات کو فروغ دینے اور عوام میں آگہی پیدا کرنے کے مقصد سے اس موبائل میوزیم کا انعقاد عمل میں لایا گیا ہے۔
اس پروگرام میں ضلع ٹریژری آفیسر اے۔ سرینواس کمار، این آئی سی آفیسر شری دھر، ضلع تعلقاتِ عامہ آفیسر ایم ڈی ایوب علی، ٹی جی او صدر جگن موہن، راجیش، پروین کمار، کلکٹریٹ عملہ اور دیگر معزز افراد نے شرکت کی۔
دستور نیوز ڈاٹ کام
