Inspection of buildings for setting up CGHS Wellness Centre — Inspection supervised by
Warangal MP Dr. Kadiyam Kavya
سی جی ایچ ایس ویلنیس سینٹر کے قیام کے لیے عمارتوں کا معائنہ — ورنگل کی رکن پارلیمنٹ ڈاکٹر کڈیم کاویا کی نگرانی میں جائزہ
حیدرآباد/ورنگل
(دستور نیوز ڈاٹ کام)
مرکزی حکومت کے ملازمین اور پنشنرز کو بہتر طبی سہولیات فراہم کرنے کے مقصد سے سینٹرل گورنمنٹ ہیلتھ اسکیم (CGHS) کے تحت ورنگل میں ویلنیس سینٹر کے قیام کی کارروائی تیزی سے جاری ہے۔ اس ضمن میں ورنگل کی رکن پارلیمنٹ ڈاکٹر کڈیم کاویا نے جمعرات کے روز خود ہنمکنڈہ میں مختلف عمارتوں کا معائنہ کیا۔
حال ہی میں ضلع کلکٹر، ورنگل میونسپل کمشنر اور دیگر عہدیداروں کے ساتھ متعدد عمارتوں کا جائزہ لینے کے بعد ڈاکٹر کاویا نے منتخب عمارتوں کی تفصیلات حیدرآباد میں CGHS کی ایڈیشنل ڈائریکٹر محترمہ روہنی کو پیش کی تھیں، اور سینٹر کے قیام کے لیے موزوں عمارت کے انتخاب کو جلد مکمل کرنے کی ہدایت دی تھی۔جمعرات کے روز ایڈیشنل ڈائریکٹر CGHS محترمہ روہنی ہنمکنڈہ پہنچیں اور ایم پی ڈاکٹر کاویا کے ساتھ مختلف سرکاری عمارتوں کا معائنہ کیا۔ اس موقع پر قاضی پیٹ ڈویژن میونسپل آفس، دوردرشن دفتر، سرکاری رہائش گاہیں، پرانا کلکٹر ہاؤس، اور KUDA آفس کا تفصیلی جائزہ لیا گیا۔ عہدیداران نے عمارتوں کی حالت، سہولیات اور رقبے کے بارے میں معلومات حاصل کیں۔
ڈاکٹر کاویا نے اس موقع پر متعلقہ عہدیداروں اور انجینئروں کے ساتھ ملاقات کرتے ہوئے کہا کہ ویلنیس سینٹر کے لیے بنیادی ڈھانچے کی فراہمی کے اقدامات کو جلد مکمل کیا جائے تاکہ مرکز کے قیام میں تاخیر نہ ہو۔بعد ازاں ہنمکنڈہ کے کنکادُرگا کالونی میں واقع اپنے پارلیمانی دفتر میں ڈاکٹر کاویا سے پنشنرز نے ملاقات کی اور CGHS ویلنیس سینٹر کے حصول کے لیے ان کی کوششوں پر اظہارِ تشکر کیا۔
انہوں نے فوری طور پر عمارتوں کے معائنہ کی کارروائی شروع ہونے پر مسرت کا اظہار کیا۔اس موقع پر ڈی ایم ایچ او ڈاکٹر اپّیا، CGHS عہدیداران، بی ایس این ایل ایمپلائز یونین کے ریاستی سکریٹری سمپت راؤ، وجئے وڈنال، وینو گوپال راؤ، مقبول حسین، سدرشن ریڈی، اعجاز اللہ، حسین، سیتا راما راؤ اور دیگر موجود تھے۔
