Police duty meets are helpful for professional skills. Abhilash Bast, Director, Telangana Police Academy
پولیس ڈیوٹی میٹ پیشہ وارانہ مہارت کے لیے معاون ثابت ہوتی ہیں۔تلنگانہ پولیس اکیڈمی کے ڈائریکٹر ابھلاش بست
حیدرآباد/ورنگل
(دستور نیوز ڈاٹ کام)
تلنگانہ پولیس اکیڈمی کے ڈائریکٹر ابھلاش بست نے کہا کہ پولیس ڈیوٹی میٹیں افسران کو اپنی پیشہ وارانہ مہارت کو نکھارنے میں نہایت مددگار ثابت ہوتی ہیں۔ وہ جمعرات کو ورنگل پولیس کمشنریٹ کے زیر اہتمام پی ٹی سی مامونور میں منعقدہ دوسری تلنگانہ پولیس ڈیوٹی میٹ کی افتتاحی تقریب سے خطاب کر رہے تھے۔
تقریب کا افتتاح ابھلاش بست کے ہمراہ ایڈیشنل ڈی جی پی مہیش بھگوت نے شاندار انداز میں کیا۔ یہ مقابلے تین دن تک جاری رہیں گے، جن میں ریاست کے سات زونز کے علاوہ سائبرآباد، راچہ کنڈہ، حیدرآباد کمشنریٹس، سی آئی ڈی، انٹیلیجنس، اینٹی نارکوٹک بیورو، سائبر سیکیورٹی وِنگ، جی آر پی، آئی ٹی اینڈ سی، اوکٹوپس اور گرے ہاؤنڈز کے افسران حصہ لے رہے ہیں۔
اس ڈیوٹی میٹ میں 400 سے زائد پولیس افسران و اہلکار شرکت کر رہے ہیں، جو کہ 25 مختلف زمروں جیسے سائنسی امداد، اینٹی سبوٹیج چیکس، کمپیوٹر، ڈاگ اسکواڈ، پروفیشنل فوٹوگرافی و ویڈیو گرافی میں اپنی مہارت کا مظاہرہ کریں گے۔افتتاحی تقریب کے موقع پر مقابلوں میں شریک افسران نے ایک شاندار پریڈ پیش کی، جس کے بعد مہمانِ خصوصی کے ہاتھوں ڈیوٹی میٹ کا جھنڈا لہرایا گیا۔مہمانِ خصوصی نے خطاب میں شرکاء کو مبارکباد پیش کرتے ہوئے کہا کہ ملک بھر میں جرائم کی تفتیش اور دیگر شعبہ جات میں تلنگانہ پولیس کا سرفہرست آنا فخر کی بات ہے۔ انہوں نے کہا کہ یہ سب آپ کی محنت اور لگن کا نتیجہ ہے اور ہمیں آپ پر مکمل اعتماد ہے کہ آپ قومی سطح پر ہونے والی ڈیوٹی میٹ میں بھی اعلیٰ کارکردگی کا مظاہرہ کرتے ہوئے مزید تمغے حاصل کریں گے۔
ایڈیشنل ڈی جی پی مہیش بھگوت نے اس موقع پر کہا کہ ورنگل میں دوسری بار پولیس ڈیوٹی میٹ کا انعقاد ہو رہا ہے، اس سے قبل 2008 میں یہاں پہلی بار میٹ منعقد ہوئی تھی۔ انہوں نے بتایا کہ حالیہ 68ویں قومی پولیس ڈیوٹی میٹ میں تلنگانہ پولیس نے 18 تمغے حاصل کرتے ہوئے ملک بھر میں پہلا مقام حاصل کیا، جو کہ ایک بڑی کامیابی ہے۔ انہوں نے امید ظاہر کی کہ آنے والے قومی مقابلوں میں تلنگانہ پولیس مزید تمغے حاصل کرے گی۔ورنگل پولیس کمشنر سنپریت سنگھ نے تلنگانہ پولیس ڈیوٹی میٹ کی تیاریوں سے متعلق تفصیلات فراہم کیں۔اس موقع پر سی آئی ڈی ڈی آئی جی نرائن نائیک، اے ایس پی رام ریڈی، ڈی سی پیز انکیت کمار، شیخ سلیم، راج مہندر نائیک، پی ٹی سی پرنسپل پوجا، کمانڈنٹس رنکمار، رام کرشنا سمیت دیگر اعلیٰ پولیس افسران موجود تھے۔
