Meeting on protection of children’s rights held at Warangal Police Commissionerate
ورنگل پولیس کمشنریٹ میں بچوں کے حقوق کے تحفظ پر اجلاس
حیدرآباد/ورنگل:-6/فروری
(دستور نیوز ڈاٹ کام)
ورنگل پولیس کمشنریٹ میں ایڈیشنل ڈپٹی کمشنر آف پولیس این روی نے کہا کہ بچوں کے حقوق کے تحفظ میں سب کی شمولیت ضروری ہے۔ انہوں نے یہ بات ہنمکنڈہ میں واقع Assuntha بھون میں منعقدہ اجلاس میں کہی، جو اینٹی ہیومن ٹریفکنگ یونٹ ورنگل پولیس کمشنریٹ اور FMM سوشل سروس آرگنائزیشن کے اشتراک سے منعقد کیا گیا تھا۔ اجلاس میں پولیس، دیگر سرکاری محکموں اور غیر سرکاری تنظیموں کے نمائندوں نے شرکت کی۔
ایڈیشنل ڈی سی پی این روی نے کہا کہ اگرچہ پولیس اور دیگر سرکاری محکمے بچوں کے تحفظ کے لیے کام کر رہے ہیں، لیکن سماج میں اب بھی بچوں کے حقوق کی خلاف ورزیاں مختلف شکلوں میں جاری ہیں۔ انہوں نے کہا کہ بعض خود غرض عناصر بچوں کی معصومیت اور غربت کا فائدہ اٹھا کر انہیں جبری مشقت میں جھونک رہے ہیں اور انہیں ہراساں کر رہے ہیں۔ انہوں نے خبردار کیا کہ بچوں کے حقوق کی خلاف ورزی کرنے والوں کے خلاف سخت کارروائی کی جائے گی اور اس مقصد کے لیے معاشرے کے تمام طبقات کو متحد ہو کر کام کرنا ہوگا۔
انہوں نے بتایا کہ جنوری 2025 میں منعقدہ "آپریشن اسمایل 11” کے تحت 162 بچوں کو ریسکیو کر کے ان کے والدین کے حوالے کیا گیا۔ تاہم، بعض مقامات پر اب بھی کم عمر بچوں کو مشقت میں جھونکا جا رہا ہے، جو قابل مذمت ہے۔ انہوں نے کہا کہ 18 سال سے کم عمر بچوں کو مزدوری پر لگانے والوں کے خلاف سخت قانونی کارروائی کی جائے گی اور ضرورت پڑنے پر پولیس کیسز بھی درج کیے جائیں گے۔
بچوں کے تحفظ کے حوالے سے ہر پولیس اسٹیشن میں ایس ایچ او کی سربراہی میں ایک خصوصی کمیٹی تشکیل دینے کی تجویز دی گئی، جس میں مختلف سرکاری محکموں اور سماجی تنظیموں کے نمائندے شامل ہوں گے تاکہ متعلقہ علاقوں میں بچوں کے تحفظ کو یقینی بنایا جا سکے۔ مزید برآں، ضلع میں منشیات کے بڑھتے ہوئے رجحان کو روکنے کے لیے ایک خصوصی کمیٹی تشکیل دی جائے گی تاکہ بچوں کو نشے کی لعنت سے محفوظ رکھا جا سکے۔
اجلاس کے دوران اینٹی ہیومن ٹریفکنگ یونٹ انسپکٹر پی وینکنا نے آپریشن اسمایل 11″ کے تحت حاصل کردہ کامیابیوں اور مستقبل کے لائحہ عمل پر پاور پوائنٹ پریزنٹیشن پیش کی۔ اجلاس میں ہنمکنڈہ، ورنگل اور جنگاؤں اضلاع میں بچوں کے تحفظ کے لیے مشترکہ کوششوں پر زور دیا گیا۔
ہنمکنڈہ ضلع کی ویلفیئر آفیسر جینتی نے کہا کہ چائلڈ لیبر اور بے سہارا بچوں کے تحفظ کے لیے خصوصی پروگرام ترتیب دیے جا رہے ہیں۔ اسی طرح ورنگل ضلع کے ویلفیئر آفیسر راجمنی نے کہا کہ بچوں کے تحفظ میں والدین کے ساتھ ساتھ سماج کی بھی بڑی ذمہ داری ہے۔ انہوں نے اس حوالے سے چائلڈ لائن اور متعلقہ سرکاری اداروں کے باہمی تعاون کی ضرورت پر زور دیا۔
اجلاس کے دوران ایڈیشنل ڈی سی پی این روی اور دیگر اعلیٰ افسران نے بچوں کے تحفظ کے لیے نمایاں خدمات انجام دینے والے پولیس افسران، سرکاری ملازمین اور غیر سرکاری تنظیموں کے نمائندوں کو تعریفی اسناد پیش کیں۔
اس اجلاس میں مختلف اداروں کے نمائندے، پولیس افسران، سماجی تنظیموں کے کارکنان اور سرکاری محکموں کے اہلکار سمیت تقریباً 140 افراد نے شرکت کی۔
