Municipal General Assembly meeting approves Rs. 658 million worth of development projects
بلدیہ جنرل اسمبلی کا اجلاس، ترقیاتی کاموں کے لیے 65.8 کروڑ روپے کے منصوبے منظور
سابق وزیر اعظم ڈاکٹر منموہن سنگھ کے انتقال پر تعزیت، دو منٹ کی خاموشی
ورنگل لوک سبھا رکن ڈاکٹر کڈیم کاویہ نے بلدیہ کے ایکس آفیشیو ممبر کی حیثیت سے حلف لیا
اندرامّا آتمیا ریتو بھروسہ اسکیم کے نفاذ کی متفقہ منظوری
حیدرآباد/ورنگل:- 29 /جنوری
(دستور نیوز ڈاٹ کام)
بلدیہ ہیڈکوارٹر کے کونسل ہال میں سٹی میئر محترمہ گنڈو سدھارانی کی صدارت میں بلدیہ کونسل کا اجلاس منعقد ہوا۔ اجلاس میں حال ہی میں وفات پانے والے سابق وزیر اعظم ڈاکٹر منموہن سنگھ کے انتقال پر گہرے رنج و غم کا اظہار کرتے ہوئے دو منٹ کی خاموشی اختیار کی گئی۔
میئر گنڈ و سدھارانی کی صدارت میں ہونے والے اس اجلاس میں ترقیاتی کاموں کے لیے 65.8 کروڑ روپے کے 23 ایجنڈا آئٹمز کو منظوری دی گئی۔ اس موقع پر ورنگل لوک سبھا رکن ڈاکٹر کڈیم کاویہ کو کمشنر کی جانب سے بلدیہ کے ایکس آفیشیو ممبر کے طور پر حلف دلایا گیا۔
اجلاس میں اتفاق رائے سے فیصلہ کیا گیا کہ غریب کسانوں اور مزدوروں کی فلاح و بہبود کے لیے اندرامّا آتمیا ریتو بھروسہ اسکیم کو بلدیہ کے دائرہ کار میں نافذ کیا جائے گا۔
اس موقع پر ریاستی محکمہ جنگلات اور ماحولیات وزیر کونڈا سریکھا نے کہا کہ وزیر اعلیٰ ریونت ریڈی نے ورنگل شہر کی ہمہ جہتی ترقی کے لیے فنڈز جاری کیے ہیں۔ انہوں نے کہا کہ 6100 کروڑ روپے کی منظوری ورنگل کی تاریخ میں سنہری الفاظ میں لکھی جائے گی۔
انہوں نے مزید کہا کہ وزیر اعلیٰ نے ماضی میں بقایا ترقیاتی کاموں کے بلز کی ادائیگی کے لیے 187 کروڑ روپے بھی منظور کیے ہیں۔ اجلاس میں ہر کارپوریٹر کو اپنے علاقے کے مسائل پیش کرنے کا موقع دیا گیا اور متعلقہ افسران کو ہدایت دی گئی کہ وہ ان مسائل کے حل کے لیے فوری اقدامات کریں۔
ورنگل مغربی کے رکن اسمبلی نائینی راجندر ریڈی نے کہا کہ تمام ڈویژنز میں بلا تفریق سیاسی وابستگی، ترقیاتی کاموں کے لیے 30 لاکھ روپے فی ڈویژن مختص کیے گئے ہیں، جس کی بدولت ترقیاتی سرگرمیاں تیز ہوئی ہیں۔ انہوں نے مزید مطالبہ کیا کہ ہر ڈویژن کو مزید 30 لاکھ روپے فراہم کیے جائیں اور ہر تین ماہ میں ایمرجنسی ترقیاتی کاموں کے لیے 5 لاکھ روپے کی اضافی رقم مختص کی جائے۔ انہوں نے اراکین سے اپیل کی کہ وہ کونسل کے وقت کو ضائع کیے بغیر اپنے متعلقہ ڈویژنز کے ترقیاتی مسائل حل کرنے پر توجہ دیں۔
وردھنا پیٹ کے رکن اسمبلی کے آر ناگاراجو نے کہا کہ ان کے حلقے سے تعلق رکھنے والے 31 دیہاتوں کو میونسپل کارپوریشن میں ضم کیا گیا ہے۔ انہوں نے مطالبہ کیا کہ ان دیہاتوں کے غریب کسانوں اور مزدوروں کو "اندیراما آتمیا ریتو بھروسا” اسکیم کے تحت فوائد فراہم کیے جائیں اور اس مقصد کے لیے کونسل متفقہ طور پر ایک قرارداد منظور کر کے حکومت کو بھیجے۔
کئی کارپوریٹرز نے غیر قانونی تعمیرات، مچھر کش مہم، اسٹریٹ لائٹس کی خرابی، آوارہ کتوں کے مسائل اور دیگر عوامی مسائل کو کونسل کے سامنے پیش کیا۔ میئر نے متعلقہ محکموں کو ان مسائل کے فوری حل کے لیے ضروری اقدامات کرنے کی ہدایت دی۔
اس اجلاس میں ایم ایل سی پوچم پلی سرینواس ریڈی، کمشنر ڈاکٹر اشوینی تانا جی واکاڈے، ڈپٹی میئر رضوانہ مسعود شمیم، مختلف کارپوریٹرز اور بلدیہ کے اعلیٰ افسران نے شرکت کی۔
