Celebrate the joys of the New Year in peace and harmony, Warangal Police Commissioner Amber Kishor Jha
نئے سال کی خوشیوں کو امن و سکون سے منانے ورنگل پولیس کمشنر امبر کشور جھا کی اپیل
حیدرآباد/ورنگل:-30/دسمبر
(دستور نیوز ڈاٹ کام)
ورنگل پولیس کمشنر امبر کشور جھا نے شہریوں سے نئے سال کی خوشیوں کے دوران امن و سکون کے ماحول میں جشن منانے کی درخواست کی ہے۔ نئے سال کی تقریبات کے پیش نظر ، کمشنر نے شہریوں سے اپیل کی کہ وہ ورنگل پولیس کمشنریٹ کی حدود میں امن و سکون کے ساتھ تقریبات منائیں تاکہ کوئی ناخوشگوار واقعہ پیش نہ آئے۔
کمشنر نے پیر کے روز ایک اعلامیہ جاری کرتے ہوئے کہا کہ 31 دسمبر کی رات ہونے والی تقریبات کے دوران پولیس فورس کی تمام شاخیں بشمول ٹریفک، ٹاسک فورس، کرائم، شی ٹیمیں اور پیٹرولنگ پولیس، شب بھر پہرہ دیں گی۔ انہوں نے یہ بھی کہا کہ یہ تقریبات رات 12:30 بجے تک مکمل ہونی چاہئیں۔کمشنر نے تاکید کی کہ تمام ثقافتی پروگراموں کے منتظمین کو پولیس کی طرف سے پیشگی اجازت حاصل کرنا ضروری ہے اور یہ کہ عوامی مقامات پر کسی بھی غیر اخلاقی یا فحش ڈانس کی اجازت نہیں ہوگی۔
انہوں نے مزید کہا کہ پروگرام کے مقامات پر سی سی ٹی وی کیمرے نصب کیے جانے چاہئیں اور سیکورٹی عملہ بھی تعینات کرنا ضروری ہے۔انہوں نے یہ بھی ہدایت دی کہ اگر اس دوران کوئی بھی شہری ٹریفک کی مشکلات پیدا کرتا ہے یا مضر مواد کا استعمال کرتا ہے تو اس کے خلاف قانونی کارروائی کی جائے گی۔
کمشنر نے خبردار کیا کہ شراب نوشی کے بعد گاڑی چلانے والوں کے خلاف سخت کاروائی کی جائے گی اور انہیں جرمانے کے ساتھ ساتھ جیل کی سزائیں بھی ہو سکتی ہیں۔ علاوہ ازیں، انہوں نے کہا کہ اگر کسی نے عوامی مقامات پر جشن مناتے ہوئے لوگوں کو تکلیف پہنچائی یا قوانین کی خلاف ورزی کی تو پولیس فوری طور پر کارروائی کرے گی۔ انہوں نے شہریوں سے درخواست کی کہ وہ اپنے گھروں میں اپنے اہل خانہ کے ساتھ خوشی کے اس موقع کو منائیں اور امن و سکون کا ماحول برقرار رکھیں۔
کمشنر نے یہ بھی کہا کہ اگر کسی نے ہدایات کی خلاف ورزی کی، تو وہ فوری طور پر ڈائل 100 پر اطلاع دے کر پولیس سے مدد لے سکتے ہیں، اور پولیس فوری طور پر ان کے خلاف کارروائی کرے گی۔ورنگل پولیس کمشنر امبر کیشور جھا کی عوام سے درخواست ہے کہ وہ نئے سال کی تقریبات کو خوشی اور امن کے ساتھ منائیں۔
