Women should break their silence, and complain to the She Team if they are harassed: Warangal Police Commissioner Amber Kishore Jha
خواتین ہراسانی کا شکار ہونے پر خاموشی توڑیں اور شی ٹیم سے شکایت کریں:ورنگل پولیس کمشنر امبر کشور جھا
حیدرآباد/ورنگل:-22/نومبر
(دستور نیوز ڈاٹ کام)
ورنگل پولیس کمشنر امبر کشور جھا نے خواتین اور طالبات سے اپیل کی ہے کہ اگر وہ کسی بھی مقام پر جنسی ہراسانی کا شکار ہو رہی ہیں تو بلا جھجک شی ٹیم سے رجوع کریں اور شکایت درج کرائیں۔
بروز جمعہ ورنگل پولیس کمشنر نے تلنگانہ خواتین تحفظ ڈپارٹمنٹ کی جانب سے تیار کردہ نئے وال پوسٹرز کی رسم اجرائی کی، جس کا مقصد خواتین میں فوری ردعمل کے لیے بیداری پیدا کرنا ہے۔
اس موقع پر خطاب کرتے ہوئے کمشنر نے کہا کہ خواتین اور لڑکیوں کے تحفظ کے لیے خصوصی اقدامات کیے جا رہے ہیں۔ پولیس ایسے افراد کے خلاف سخت کارروائی کر رہی ہے جو خواتین پر جنسی حملے کرتے ہیں۔
انہوں نے خواتین سے اپیل کی کہ وہ اجنبی افراد اور خاص طور پر سوشل میڈیا پر ملنے والے افراد کے ساتھ محتاط رہیں اور اپنی ذاتی معلومات ان سے شیئر نہ کریں۔
پولیس کمشنر نے زور دیا کہ وہ خواتین، طالبات اور لڑکیاں جو اپنے کام کی جگہوں یا دیگر مقامات پر ہراسانی کا شکار ہیں، یا وہ طلباء جو ریگنگ کی وجہ سے پریشان ہیں، وہ خاموش نہ رہیں بلکہ بہادری کا مظاہرہ کرتے ہوئے مقامی شی ٹیم یا ڈائل 100 کے ذریعے شی ٹیم کو اطلاع دیں تاکہ ان کا تحفظ یقینی بنایا جا سکے۔
اس پروگرام میں ایڈیشنل ڈی سی پی ایڈمنسٹریٹو ڈپارٹمنٹ روی، اسپیشل برانچ اے سی پی جیتندر ریڈی، ورنگل شی ٹیم انسپکٹر سجاتا اور شی ٹیم کے دیگر عملے نے بھی شرکت کی۔
