تلنگانہ میں خانہ بدوش مسلمانوں کے حقوق کے لیے ریاست گیر تحریک کا اعلان، خصوصی کارپوریشن اور سالانہ ایک ہزار کروڑ بجٹ کا مطالبہ
Telangana Nomadic Muslims Demand Special Corporation and ₹1,000 Crore Annual Budget
حیدرآباد/کریم نگر26/اکتوبر
(دستورنیوز)
تلنگانہ میں خانہ بدوش مسلم برادریوں کے حقوق کے تحفظ اور حکومت کی جانب سے انتخابی وعدوں کی تکمیل کے مطالبے پر ریاست گیر احتجاجی تحریک شروع کرنے کا فیصلہ کیا گیا ہے۔ اس سلسلے میں حیدرآباد میں تلنگانہ ریاستی سنچار مسلم قبائل سنگم کے قائدین اور دانشوروں کا ایک ہنگامی اجلاس منعقد ہوا، جس میں آئندہ کی حکمت عملی طے کرتے ہوئے ریاست بھر میں احتجاجی پروگراموں کو تیز کرنے کا اعلان کیا گیا۔
تلنگانہ ریاستی سنچار مسلم قبائل سنگم (BC E 1-14) کے قائدین نے الزام عائد کیا کہ کانگریس حکومت نے اقتدار میں آنے کے بعد خانہ بدوش مسلم برادریوں سے کیے گئے وعدوں میں سے کسی ایک کو بھی پورا نہیں کیا۔ ان کا کہنا تھا کہ حکومت کی جانب سے وعدوں پر عمل آوری میں مسلسل تاخیر سے ان برادریوں میں ناراضگی بڑھ رہی ہے۔
خصوصی کارپوریشن کے قیام کا مطالبہ
سنگم کے بانی ایم ڈی شبیر نے کہا کہ حکومت نے خانہ بدوش مسلمانوں سے کیے گئے وعدوں کو نظرانداز کیا ہے اور اس رویے کو مزید برداشت نہیں کیا جائے گا۔ انہوں نے اعلان کیا کہ بہت جلد ریاست بھر میں احتجاجی پروگرام منعقد کیے جائیں گے۔
سنگم کے صدر شیر علی نے حکومت پر تنقید کرتے ہوئے کہا کہ اقتدار میں آنے کے چھ ماہ کے اندر وعدوں پر عمل کرنے کی یقین دہانی کرائی گئی تھی، لیکن اب تک کوئی وعدہ پورا نہیں ہوا۔ انہوں نے مطالبہ کیا کہ خانہ بدوش مسلمانوں کی فلاح و بہبود کے لیے فوری طور پر ایک علیحدہ کارپوریشن قائم کی جائے اور اس کے لیے ہر سال ایک ہزار کروڑ روپے کا بجٹ مختص کیا جائے۔
سنگم کے خازن ایم ڈی شاد اللہ نے خانہ بدوش مسلم برادریوں سے اپیل کی کہ وہ اپنے حقوق کے حصول کے لیے متحد ہوکر جدوجہد کریں۔ انہوں نے اس تحریک کو برادری میں بیداری کی نئی لہر قرار دیا۔
تمام تنظیموں سے متحدہ جدوجہد کی اپیل
اجلاس میں شریک دیگر قائدین فقیر جہانگیر، حسین، بڑے صاحب، مجاہد، نثار احمد اور دیگر نمائندوں نے کہا کہ حقوق کی جدوجہد کو مؤثر بنانے کے لیے تمام سیاسی جماعتوں، سماجی تنظیموں اور برادریوں کو ساتھ لے کر آگے بڑھنے کی ضرورت ہے۔ انہوں نے طویل جدوجہد کے لیے تیار رہنے کی اپیل کی۔
اجلاس میں شریک قائدین
اجلاس میں جانو جاگو کے قومی صدر نثار احمد، یونائٹیڈ مسلم اسٹیٹ کے ورکنگ پریسیڈنٹ اور شیخ مسلم صدر مجاہد، مشیر وسیم احمد، پسماندہ مسلم صدر فقیر جہانگیر، فقیر سنگم کے بانی حسین، مشیر پروفیسر انور اور دھوبی مسلم صدر ابوبکر نے شرکت کی۔
اس کے علاوہ ریاستی رکن حمید، نائب صدر قاسم پاشاہ، یعقوب گراڈی، جوائنٹ سکریٹری سلیم، ضلعی صدور شمس الدین، رسول اور عبداللہ، نیز فقیر خواجہ، فقیر مولاعلی، سید مولا صاحب، فقیر حسین، محمد حسین، شیخ امام صاحب اور ایم ڈی سلیم سمیت دیگر قائدین موجود تھے۔ ترکاخاص صدر بڑے صاحب نے ٹیلی فون کے ذریعے اجلاس کی بحث میں حصہ لیا۔
dastoornews
akbar zia
