CM Revanth Reddy Seeks Greater Support from Aga Khan Foundation for Telangana’s Development
تلنگانہ کی ترقی میں آغا خان فاؤنڈیشن مزید تعاون کرے: ریونت ریڈی
حیدرآباد، 15 ستمبر:
(دستور نیوز )
تلنگانہ کے چیف منسٹر اے ریونت ریڈی نے آغا خان فاؤنڈیشن سے ریاست میں جاری ترقیاتی سرگرمیوں میں مزید تعاون کی اپیل کی ہے۔ انہوں نے کہا کہ تلنگانہ میں تعلیم، سیاحت اور طبی شعبوں میں آغا خان فاؤنڈیشن کے ساتھ مل کر کام کرنے کے وسیع امکانات موجود ہیں۔
بھارت کے دورے پر موجود آغا خان فاؤنڈیشن کے چیئرمین ہز ہائنس پرنس رحیم آغا خان پنجم نے حیدرآباد کا دورہ کیا، جہاں چیف منسٹر ریونت ریڈی نے تاج فلک نما پیلس میں ان سے ملاقات کی۔
ملاقات کے دوران چیف منسٹر نے تلنگانہ میں آغا خان فاؤنڈیشن کی جانب سے انجام دیے گئے ترقیاتی اور ورثہ کے تحفظ کے کاموں کو سراہا۔ انہوں نے کہا کہ انہیں آغا خان فاؤنڈیشن کا بے حد احترام ہے اور حیدرآباد کے ساتھ آغا خان خاندان کے دیرینہ تعلقات بھی قابلِ ذکر ہیں۔
ریونت ریڈی نے کہا کہ تلنگانہ کے تاریخی اور ثقافتی ورثے کے تحفظ اور بحالی میں آغا خان فاؤنڈیشن نے اہم کردار ادا کیا ہے۔ انہوں نے فاؤنڈیشن کے تعاون سے قانون ساز کونسل کی عمارت اور حیدرآباد کے تاریخی قطب شاہی مقابر کی بحالی کا حوالہ بھی دیا۔
چیف منسٹر نے حیدرآباد کی ازسرنو ترقی کے منصوبے کے تحت موسیٰ ندی کی بحالی سے متعلق حکومت کی منصوبہ بندی سے پرنس رحیم آغا خان پنجم کو واقف کرایا۔ انہوں نے بتایا کہ موسیٰ ندی کے اطراف نائٹ اکانومی کو فروغ دینے کے لیے بھی اقدامات کیے جا رہے ہیں۔
انہوں نے موسیٰ ندی کے اطراف موجود تاریخی سٹی کالج اور عثمانیہ جنرل ہاسپٹل کی عمارتوں کی بحالی میں آغا خان فاؤنڈیشن سے تعاون کی خواہش ظاہر کی۔ چیف منسٹر نے بتایا کہ عثمانیہ ہاسپٹل کے لیے گوشہ محل میں ایک نئی عمارت تعمیر کی جا رہی ہے، جبکہ موجودہ عثمانیہ ہاسپٹل کی تاریخی عمارت کو ہیریٹیج اثاثے کے طور پر محفوظ کرنے کا حکومت کا ارادہ ہے۔
پرنس رحیم آغا خان کو انویسٹ تلنگانہ گلوبل سمٹ کی دعوت
چیف منسٹر ریونت ریڈی نے پرنس رحیم آغا خان پنجم کو 7 سے 9 دسمبر تک بھارت فیوچر سٹی میں منعقد ہونے والے تین روزہ انویسٹ تلنگانہ گلوبل سمٹ میں شرکت کی دعوت دی۔ انہوں نے بتایا کہ اس عالمی سمٹ میں 100 سے زائد ممالک کے نمائندے شرکت کریں گے۔
پرنس رحیم آغا خان پنجم نے فیوچر سٹی کی ترقی میں دلچسپی کا اظہار کرتے ہوئے اس کی اہمیت کے بارے میں معلومات حاصل کیں۔ چیف منسٹر نے بتایا کہ تقریباً 30 ہزار ایکڑ رقبے پر جدید سہولتوں سے آراستہ فیوچر سٹی تعمیر کیا جا رہا ہے، جو بین الاقوامی ہوائی اڈے سے تقریباً 20 منٹ کی مسافت پر واقع ہوگا اور اسے مکمل طور پر نیٹ زیرو سٹی کے طور پر تیار کیا جائے گا۔
انہوں نے بتایا کہ سنگاپور کی ایک کمپنی فیوچر سٹی کا ماسٹر پلان تیار کر رہی ہے، جبکہ تقریباً 15 ہزار ایکڑ رقبے پر گرین زون قائم کیا جائے گا۔ چیف منسٹر نے کہا کہ ایمیزون جیسی کمپنیاں فیوچر سٹی میں پہلے ہی اپنی سرگرمیاں شروع کر چکی ہیں۔ حکومت کا مقصد 2047 تک ملک کی مجموعی جی ڈی پی میں تلنگانہ کے حصے کو 10 فیصد تک بڑھانا ہے۔
تعلیم کے شعبے میں تعاون کی اپیل
چیف منسٹر کے مشیر کے رام کرشنا راؤ نے حالیہ برطانیہ اور امریکہ کے دوروں کے دوران تلنگانہ حکومت کی جانب سے عالمی سطح کی مختلف یونیورسٹیوں کے ساتھ کیے گئے معاہدوں کی تفصیلات پرنس رحیم آغا خان پنجم کے سامنے پیش کیں۔
انہوں نے بتایا کہ ہارورڈ یونیورسٹی، لندن اسکول آف بزنس سمیت دیگر عالمی اداروں نے حیدرآباد میں اپنی سرگرمیاں شروع کرنے پر آمادگی ظاہر کی ہے۔
ریاستی محکمہ تعلیم کی پرنسپل سیکریٹری یوگیتا رانا نے پرنس رحیم آغا خان پنجم سے اپیل کی کہ فیوچر سٹی میں آغا خان یونیورسٹی کے قیام کے امکانات پر غور کیا جائے۔
خصوصی چیف سکریٹری وانی پرساد نے سیاحت کے شعبے میں آغا خان فاؤنڈیشن کے کردار کو اجاگر کرتے ہوئے مستقبل میں ریاست کے لیے مزید تعاون فراہم کرنے کی خواہش ظاہر کی۔
ملاقات میں وزیر محمد اظہرالدین، چیف سکریٹری سنجے جاجو کے علاوہ اعلیٰ عہدیداران اور آغا خان فاؤنڈیشن کے نمائندوں نے شرکت کی۔
dastoornews.com
