Woman arrested for habitual theft in RTC buses. Police seize 188 grams of gold jewellery worth Rs 1.55 million from accused
آر ٹی سی بسوں میں عادی چوری کرنے والی خاتون گرفتار۔
پولیس نے ملزمہ کے قبضے سے تقریباً 15 لاکھ 50 ہزار روپے مالیت کے 188 گرام سونے کے زیورات ضبط
حیدرآباد/ورنگل:-23/جنوری
(دستور نیوز ڈاٹ کام)
ہنمکنڈہ پولیس نے جمعرات کو آر ٹی سی بسوں میں تنہا مسافروں کو نشانہ بناکر چوری کرنے والی خاتون چور کو گرفتار کرلیا۔
پولیس نے ملزمہ کے قبضے سے تقریباً 15 لاکھ 50 ہزار روپے مالیت کے 188 گرام سونے کے زیورات ضبط کیے ہیں۔ہنمکنڈہ اے سی پی دیویندر ریڈی نے گرفتاری کی تفصیلات بتاتے ہوئے کہا کہ ملزمہ کٹروجو وجیا (50) جو ورنگل کے شیونگر علاقے کی رہائشی ہے اور اس کا شوہر ایک بڑھئی کے طور پر کام کرتا ہے۔ شوہر کے شراب نوشی کرنے اور آمدنی کم ہونے کی وجہ سے گھر کے اخراجات پورے کرنا مشکل ہوگیا تھا۔
ان حالات میں ملزمہ نے آسانی سے پیسہ کمانے کی راہ اختیار کی۔شروع میں اس نے کپڑوں کی دکانوں میں چوری شروع کی اور بعد میں بسوں، ریلوں اور آٹوز میں تنہا سفر کرنے والے مسافروں کو نشانہ بناکر سونے کے زیورات چرانا شروع کیا۔ پہلی بار اس نے کھمم سے ورنگل تک سفر کے دوران ایک خاتون کا بیگ چوری کیا اور پکڑی گئی، جس کے نتیجے میں جیل گئی۔اس کے بعد، مختلف علاقوں میں 14 چوری کی وارداتیں انجام دیں جن میں ہنمکنڈہ، مٹھواڑہ، ملگ اور دیگر مقامات شامل ہیں۔
جیل سے رہائی کے بعد بھی اس کی عادت میں کوئی تبدیلی نہیں آئی۔ گزشتہ سال فروری اور مارچ میں ہنمکنڈہ بس اسٹینڈ پر دو خواتین کے زیورات اور دسمبر میں ایک خاتون کے بیگ سے زیورات چوری کیے۔چار دن قبل ہنمکنڈہ بس اسٹینڈ پر ایک اور چوری کی کوشش کے بعد پولیس نے اس پر خصوصی توجہ دی۔ سینٹرل زون ڈی سی پی شیخ سلیمہ کی ہدایت پر پولیس نے جدید ٹیکنالوجی کا استعمال کرتے ہوئے ملزمہ کی نقل و حرکت پر نظر رکھی۔آج صبح جب وہ چوری شدہ مال فروخت کرنے کے لیے ٹیلر اسٹریٹ جارہی تھی، تو پولیس کو دیکھ کر فرار ہونے کی کوشش کی، لیکن پیٹرولنگ پولیس نے اسے روک لیا اور تلاشی کے دوران زیورات برآمد کرلیے۔ دوران تفتیش اس نے تمام جرائم کا اعتراف کرلیا۔
ہنمکنڈہ انسپکٹر ستییش، کرائم ایس آئی کشور، ایڈمن ایس آئی اشوک کمار، اے اے او سلمان پاشا، ہیڈ کانسٹیبل نارائنا، رہوف، اور کانسٹیبل مہیش، اشوک، ویرنا، بھاسکر کو ان کی شاندار کارکردگی پر اے سی پی نے مبارکباد دی۔
