Strict Action Against Illegal Activities: East Zone DCP Ankit Kumar Warns Rowdy Sheeters
غیر قانونی سرگرمیوں میں ملوث افراد کو ہرگز برداشت نہیں کیا جائے گا: ایسٹ زون ڈی سی پی انکیت کمار
ورنگل: 15/مئی
(دستور نیوز ڈاٹ کام)
پولیس کمشنر کی ہدایات کے مطابق مامنور ڈویژن پولیس کے زیر اہتمام جمعہ کے روز مامنور ڈویژنل پولیس دفتر میں راؤڈی شیٹرس کے لیے ایک خصوصی کونسلنگ پروگرام منعقد کیا گیا۔ اس پروگرام کی قیادت انکیت کمار نے کی۔
اس موقع پر ڈی سی پی انکیت کمار نے راؤڈی شیٹرس کو سخت انتباہ دیتے ہوئے کہا کہ عوام کے تحفظ اور امن و امان کی برقراری کے لیے جرائم پیشہ عناصر کو قانون کے دائرے میں رہتے ہوئے زندگی گزارنی ہوگی۔ انہوں نے واضح کیا کہ عوام میں خوف و ہراس پھیلانے، دھمکانے، جھگڑوں اور غنڈہ گردی جیسی سرگرمیوں کو کسی بھی صورت برداشت نہیں کیا جائے گا۔
ڈی سی پی نے کہا کہ تمام افراد قانون کا احترام کریں اور پولیس کی ہدایات پر سختی سے عمل کریں۔ انہوں نے مشتبہ سرگرمیوں، شراب نوشی، جوا، غیر قانونی وصولیوں اور دیگر غیر قانونی کاموں سے دور رہنے کی ہدایت دی۔
انہوں نے مزید کہا کہ اگر کسی علاقے میں کوئی جرائم پیشہ واقعہ پیش آئے تو فوری طور پر قریبی پولیس اسٹیشن کو اطلاع دی جائے۔ راؤڈی شیٹرس کو مشورہ دیا گیا کہ وہ معاشرے میں باعزت زندگی گزارنے کے لیے روزگار حاصل کریں اور اگر ان کے فون نمبر، پتہ یا دیگر ذاتی معلومات میں کوئی تبدیلی آئے تو فوری طور پر متعلقہ پولیس اسٹیشن کو مطلع کریں۔
ڈی سی پی انکیت کمار نے خبردار کیا کہ اگر راؤڈی شیٹرس اپنی روش تبدیل کر کے قانون کے مطابق زندگی گزاریں گے تو معاشرے میں عزت حاصل کر سکتے ہیں، بصورت دیگر ان کے خلاف سخت قانونی کارروائی عمل میں لائی جائے گی۔
اس پروگرام میں وینکٹیش، انسپکٹر سرینواس یادو، وشویشور، سریش سنگھم اور ایس آئی ومشی کرشنا سمیت دیگر پولیس عہدیداران شریک تھے۔
Dastoor news
