Grand Republic Day Celebrations Held at Greater Warangal Press Club
گریٹر ورنگل پریس کلب میں یومِ جمہوریہ کی شاندار تقریبات
حیدرآباد/ہنمکنڈہ:26/جنوری
(دستور نیوز ڈاٹ کام)
یومِ جمہوریہ کے موقع پر گریٹر ورنگل پریس کلب میں شاندار اور باوقار تقاریب کا انعقاد عمل میں آیا۔ اس موقع پر پریس کلب کے صدر ویمولا ناگراجو نے قومی پرچم لہرایا، جس کے بعد موجود صحافیوں نے قومی ترانہ پیش کیا۔
تقریب کے آغاز میں آئینِ ہند کے معمار ڈاکٹر بی آر امبیڈکر اور بابائے قوم مہاتما گاندھی کی تصاویر پر صدر ویمولا ناگراجو، جنرل سیکریٹری بولارم سدّیا اور خزانچی بولا امَر نے گلپوشی کر کے خراجِ عقیدت پیش کیا۔
اس موقع پر خطاب کرتے ہوئے گریٹر ورنگل پریس کلب کے صدر ویمولا ناگراجو نے کہا کہ پریس کلب کی ترقی کے معاملے میں کسی بھی دباؤ کو خاطر میں نہیں لایا جائے گا۔ انہوں نے بتایا کہ این پی ڈی سی ایل کے تعاون سے پریس کلب کے عقب میں کمپاؤنڈ وال جبکہ سامنے اور شمالی سمت میں احاطہ جاتی دیواریں رکنِ اسمبلی نائنی راجندر ریڈی کے فنڈز سے تعمیر کی گئی ہیں۔
انہوں نے مزید کہا کہ گریٹر ورنگل میونسپل کارپوریشن کی مئیر گنڈو سدھارانی کے تعاون سے پریس کلب احاطہ میں سی سی روڈ اور گرینری کے کام کو ایک ماہ کے اندر مکمل کیا جائے گا۔ ویمولا ناگراجو نے واضح کیا کہ کلب کے اپنے فنڈز سے ایک پیسہ بھی خرچ کیے بغیر تقریباً 50 لاکھ روپے کے سرکاری فنڈز سے ترقیاتی کام انجام دیے گئے ہیں اور آئندہ بھی کیے جائیں گے۔
پریس کلب کے صدر نے اعلان کیا کہ صحافیوں کی دیرینہ خواہش کو پورا کرنے کے لیے نجی اراضی خرید کر معزز اراکین کو فراہم کرنے کا ایک بڑا منصوبہ شروع کیا جا رہا ہے۔ پہلے مرحلے میں گریٹر ورنگل پریس کلب کے 200 سے 250 اراکین صحافیوں کو رہائشی پلاٹس فراہم کیے جائیں گے۔ انہوں نے اراکین سے اپیل کی کہ آئندہ ماہ کی 14 تاریخ سے پہلی قسط کی ادائیگی کے لیے تیار رہیں۔
انہوں نے اس تاریخی منصوبے کے دوران پیش آنے والے چیلنجز کا سامنا کرنے اور کسی بھی قسم کی غلط تشہیر کا ڈٹ کر مقابلہ کرنے کی اپیل بھی کی
اس موقع پر میڈیا اکیڈمی کے چیئرمین کے سری نواس ریڈی، ٹی یو ڈبلیو جے اور آئی جے یو کے ریاستی صدر و سیکریٹری ورہت علی اور رام نارائن، ریاستی ہاؤسنگ اینڈ ویلفیئر کمیٹی کے چیئرمین والالا وینکٹ رمن، ریاستی نائب صدر گاڈی پلی مدھو، ہنمکنڈہ ضلع صدر گڈم راجی ریڈی، سیکریٹری تھوٹا سدھاکر، سابق صدر گڈم کیشو مورتی سمیت مختلف صحافتی تنظیموں کے قائدین اور اراکین نے شرکت کی۔
اسی موقع پر گریٹر ورنگل پریس کلب کے احاطہ میں صدر ویمولا ناگراجو کی سالگرہ کی تقریبات بھی جوش و خروش کے ساتھ منائی گئیں۔ بڑی تعداد میں صحافیوں نے شرکت کی، کیک کاٹا گیا اور ناگراجو کو گل ہائے عقیدت پیش کر کے تہنیت دی گئی۔
اس تقریب میں گاڈی پلی مدھو، گڈم راجی ریڈی، تھوٹا سدھاکر، گڈم کیشو مورتی، نلالا بچی ریڈی، بولارم سدّیا، بولا امَر، گوکارپو شیام، بوڈیگے سری نو، اللّم راجیش ورما، یمسانی سری نواس، پوڈی چیٹی وشنو وردھن، ولی شیٹی سدھاکر، سری کانت، نعیم پاشا، دلیپ، منچالا راجو، اڈوپ سمبشیوا راؤ، کرن ریڈی، راجندر پرساد، وینکٹ، یووراجو، رمیش و دیگر نے شرکت کر کے نیک تمناؤں کا اظہار کیا۔
دستور نیوز ڈاٹ کام
