Awareness about breast cancer among women is very important. — Warangal District Principal Judge VB Nirmala Gitamba
خواتین میں چھاتی کے سرطان کے تئیں بیداری نہایت ضروری۔ — ورنگل ضلع کی پرنسپل جج وی بی نرملا گیتامبا
حیدرآباد/ورنگل:-28/اکتوبر
(دستور نیوز ڈاٹ کام)
ورنگل ضلع کی پرنسپل جج وی بی نرملا گیتامبا نے کہا کہ خواتین میں چھاتی کے سرطان (بریسٹ کینسر) کے بارے میں بیداری نہایت ضروری ہے تاکہ اس موذی مرض کا بروقت علاج ممکن ہو سکے۔آج رینووا بانو کینسر اسپتال کے زیرِ اہتمام منعقدہ "واک تھان” پروگرام میں وی بی نرملا گیتا مبا نے بحیثیت مہمانِ خصوصی شرکت کی۔
اس موقع پر انہوں نے مریضوں میں پھل تقسیم کیے اور عوام کو کینسر سے متعلق احتیاطی تدابیر اپنانے کی تلقین کی۔انہوں نے اپنے خطاب میں کہا کہ اگر کینسر کو ابتدائی مرحلے میں ہی پہچانا جائے تو اس کا علاج آسان ہو جاتا ہے اور جان بچائی جا سکتی ہے۔ خواتین میں آگاہی کی کمی کی وجہ سے بریسٹ کینسر کے واقعات بڑھ رہے ہیں۔ خوف کے بجائے علاج پر توجہ دینی چاہیے، کیونکہ زندگی قیمتی ہے۔
جج نرملا گیتامبا نے مزید کہا کہ ماہر ڈاکٹروں اور جدید طبی سہولیات کی بدولت سرطان کو ابتدائی مرحلے میں روکا جا سکتا ہے۔ کینسر پر قابو پانے والے مریض دوسروں کے لیے حوصلے کی مثال ہیں۔ باقاعدہ طبی معائنہ کروانا اپنے اور اپنے خاندان کے لیے بہترین تحفہ ہے۔
اس موقع پر ضلع لیگل سروس اتھارٹی کے سیکریٹری ایم سائی کمار، ورنگل وکلا ایسوسی ایشن کے صدر وَلُوسا سدھیر، رینووا بانو کینسر اسپتال کی ڈاکٹر پریانکا، ڈاکٹر شیو کمار، ڈاکٹر ونود کمار، ڈاکٹر وِشنو وردھن ریڈی، ڈاکٹر ترن ریڈی، ڈاکٹر رویندر ریڈی اور ڈاکٹر بھاسکر سمیت دیگر معزز شخصیات موجود تھیں۔واک تھان ریلی ملگو روڈ سے ہنمکنڈہ چوراہے تک نکالی گئی، جس میں بڑی تعداد میں عوام نے شرکت کی۔
