CPI State Secretary and MLA Kunanini Sambishwara Rao demands judicial inquiry into Operation Kagar
کگار آپریشن پر عدالتی تحقیقات کا مطالبہ ،سی پی آئی ریاستی سیکریٹری و ایم ایل اے کُنانینی سامبشورا راؤ
حیدرآباد/ہنمکنڈہ:- 27 /مئی
(دستور نیوز ڈاٹ کام)
سی پی آئی ریاستی سیکریٹری اور کھمم کے ایم ایل اے کُنانینی سامبشورا راؤ نے مرکزی حکومت کے زیر قیادت "کگار آپریشن” پر عدالتی تحقیقات کا مطالبہ کیا ہے۔ انہوں نے کہا کہ چتیس گڑھ میں پیش آئے فرضی انکاؤنٹرز کو سپریم کورٹ کو ازخود نوٹس کے طور پر لینا چاہیے۔منگل کو ہنمکنڈا ضلع کے ہسن پرتی منڈل مرکز میں سی پی آئی مہاسبھاؤں کے دوسرے دن نمائندہ اجلاس سے خطاب کرتے ہوئے سامبشورا راؤ نے کہا کہ فرضی انکاؤنٹرز کے سبب نکسلائٹوں کی لاشیں ان کے اہل خانہ کو دینے میں بھی حکومت خوف محسوس کر رہی ہے۔انہوں نے الزام لگایا کہ دہشت گردوں کو پکڑنے میں ناکام بی جے پی حکومت، ملک کے شہریوں کو ماؤوادی قرار دے کر قتل کر رہی ہے اور وزیراعظم نریندر مودی اسے جشن کا موقع بنا رہے ہیں۔
انہوں نے سوال کیا کہ حکومت دہشت گردوں سے بات چیت کرنے کے لیے تیار ہے تو ملک کے لیے جدوجہد کرنے والے ماؤوادیوں سے بات چیت کیوں نہیں کرنا چاہتی؟سامبشورا راؤ نے کہا کہ مودی کو کمیونسٹوں سے سب سے زیادہ خوف ہے، اسی لیے انکاؤنٹرز کے بعد لاشیں دینے سے بھی گھبرا رہی ہے۔ انہوں نے دعویٰ کیا کہ حالیہ دنوں میں سینکڑوں ماؤوادیوں کو مار دیا گیا ہے، اور مودی و امت شاہ یہ اعلان کر رہے ہیں کہ وہ کمیونسٹوں کا صفایا کر دیں گے۔انہوں نے کہا کہ ایسے لیڈران کا انجام ہٹلر اور مسولینی جیسا ہی ہوگا۔ ملک میں تمام سرخ جھنڈا رکھنے والی جماعتوں کو متحد ہو کر لڑنے کی ضرورت ہے تاکہ برجواء طاقتوں کا مقابلہ کیا جا سکے۔انہوں نے الزام لگایا کہ بی آر ایس بی جے پی سے اتحاد کی کوشش کر رہی ہے، جو کہ کے سی آر کی بیٹی کویتا کی جانب سے وزیراعظم کو لکھے گئے خط سے ظاہر ہوتا ہے۔انہوں نے مزید کہا کہ اقتدار میں رہیں یا نہ رہیں، کمیونسٹ جماعتیں عوام کے لیے لڑتی رہیں گی اور عوام کو ان کے وجود کو بچانا چاہیے۔
امبیڈکر وادی اور کمیونسٹوں کو متحد ہونا ہوگا” – سی پی آئی ریاستی معاون سیکریٹری تکالہ پلی سرینواس راؤ سی پی آئی مہاسبھا کے دوسرے دن کے موقع پر نمائندہ اجلاس کا آغاز کرتے ہوئے ریاستی معاون سیکریٹری تقلاپلی سرینواس راؤ نے کہا کہ بی جے پی حکومت تیسری بار اقتدار میں آنے کے بعد منووادی نظریات کو نافذ کرنے کی کوشش کر رہی ہے اور امبیڈکر کے دئیے گئے آئین کو بدلنا چاہتی ہے۔انہوں نے کہا کہ آپریشن کگار، وقف بل جیسے اقدامات کے ذریعے مسلمانوں، عیسائیوں اور کمیونسٹوں کو دشمن سمجھ کر نشانہ بنایا جا رہا ہے، اس لیے امبیڈکر وادیوں اور کمیونسٹوں کو متحد ہونا ہوگا۔انہوں نے الزام لگایا کہ ملک کی فی کس آمدنی بڑھنے کا دعویٰ غلط اعداد و شمار پر مبنی ہے اور اصل میں صرف امبانی اور اڈانی جیسے کارپوریٹ اداروں کا منافع بڑھا ہے۔ریاستی حکومت کو تنقید کا نشانہ بناتے ہوئے انہوں نے کہا کہ انتخابی وعدوں پر عمل نہ ہونے کی صورت میں سی پی آئی تحریک چلائے گی۔
انہوں نے ورنگل کو ریاست کا دوسرا دارالحکومت بنانے، غریبوں کو ان کے مکانات کے لیے زمین الاٹ کرنے، کوچ فیکٹری اور سافٹ ویئر کمپنیوں کے قیام، اور مقامی نوجوانوں کو ملازمتیں دینے کا مطالبہ کیا۔
اس اجلاس میں ضلع سی پی آئی سکریٹری کررے بکشا پتی نے پارٹی کی کارکردگی کی رپورٹ پیش کی، اور سابق ایم ایل اے و قومی عاملہ رکن چاڈا وینکٹ ریڈی نے خطاب کیا۔پروگرام کے آغاز میں سینئر رہنما موتھے لنگاریڈی نے سی پی آئی کا جھنڈا لہرایا۔
مہاسبھا کی صدارت منچالا رمادیوی، بّتّنی سدانندم، میتو شیام سندر ریڈی، اُتکوری پرنیت گوڑ، ویلوپولا سارنگا پانی، مالوت شَنکر نے کی۔اس موقع پر ریاستی کمیٹی رکن ندونوری جیوتی، ضلع سکریٹری میکالا روی، سابق سکریٹری سِربوئینا کرناکر، معاون سکریٹریز شیخ باشمیا، پنسا پرساد، تھوٹا بکشا پتی، مڈڈی یلّیش، آداری سرینواس، ماندا سدا لکشمی، این اشوک اسٹالن، پرجا ناٹیا منڈلی کے جنرل سیکریٹری پَلّے نرسمہا و دیگر نے شرکت کی۔
