Parents’ Care Is the Responsibility of Children: DLSA Secretary Poojitha
والدین کی کفالت اور دیکھ بھال اولاد کی ذمہ داری ہے، بزرگوں کو ہراساں کرنے والوں کے خلاف سخت کارروائی ہوگی
ضلع قانونی خدمات اتھارٹی کے زیر اہتمام عالمی یومِ بزرگاں کے موقع پر بیداری پروگرام، بزرگوں کی گلپوشی اور پھلوں کی تقسیم
ہنمکنڈہ، یکم اکتوبر:
(دستور نیوز)
عالمی یومِ بزرگاں کے موقع پر ضلع قانونی خدمات اتھارٹی (DLSA) کے زیر اہتمام بزرگ شہریوں کی کفالت، تحفظ اور حقوق سے متعلق قانون پر بیداری پروگرام منعقد کیا گیا۔ اس موقع پر ضلع قانونی خدمات اتھارٹی کی سکریٹری جج نریلا وینکٹ ہائما پوجیتا اور سینئر سٹیزنس ٹریبونل کورٹ کی رکن و انوراگ سوسائٹی کی چیئرپرسن ڈاکٹر انیتا ریڈی نے کاکتیہ یونیورسٹی کے قریب واقع لارڈ اولڈ ایج ہوم کا دورہ کیا اور بزرگوں سے ملاقات کرتے ہوئے ان کی خیریت دریافت کی۔
بعد ازاں بزرگ شہریوں کی کفالت و تحفظ کے قانون اور ٹریبونل کی خدمات سے متعلق شعور بیداری پروگرام منعقد ہوا، جس کی صدارت ڈاکٹر انیتا ریڈی نے کی، جبکہ جج نریلا وینکٹ ہائما پوجیتا نے بحیثیت مہمانِ خصوصی شرکت کی۔
اس موقع پر خطاب کرتے ہوئے جج پوجیتا اور ڈاکٹر انیتا ریڈی نے کہا کہ والدین کی کفالت اور دیکھ بھال اولاد کی بنیادی ذمہ داری ہے۔ بزرگ شہریوں کے مسائل کی یکسوئی اور ان کے حقوق کے تحفظ کے لیے ٹریبونل ایک اہم قانونی سہولت ہے۔ اگر کسی بزرگ کو کسی قسم کی پریشانی، ناانصافی یا ہراسانی کا سامنا ہو تو وہ ضلع قانونی خدمات اتھارٹی یا سینئر سٹیزنس ٹریبونل سے رجوع کرسکتے ہیں۔
انہوں نے کہا کہ بڑھاپا کسی کے لیے بوجھ یا مصیبت نہیں بننا چاہیے اور بزرگوں کے ساتھ بدسلوکی یا انہیں ہراساں کرنے والوں کے خلاف سخت کارروائی کی جائے گی۔ انہوں نے والدین کو مشورہ دیا کہ وہ اپنی زندگی میں اپنی تمام جائیداد اولاد کے نام منتقل نہ کریں بلکہ اپنی ضروریات کے لیے مناسب حصہ محفوظ رکھیں اور بقیہ جائیداد کی منتقلی کے لیے وصیت کا طریقہ اختیار کریں۔
مقررین نے مزید کہا کہ جو اولاد والدین کی ذمہ داری قبول کرنے سے انکار کرتی ہے، اسے والدین کی جائیداد اور اختیارات پر حق جتانے کا اخلاقی جواز نہیں ہونا چاہیے۔ بزرگوں کا احترام اور ان سے محبت ہماری تہذیب و ثقافت کا اہم حصہ ہے۔ والدین سے محبت نہ کرنے اور انہیں تکلیف پہنچانے والے افراد خواہ کتنے ہی دولت مند کیوں نہ ہوں، اخلاقی اعتبار سے محروم ہیں۔
انہوں نے اس بات پر زور دیا کہ والدین کی دیکھ بھال اور ان کی ضروریات کی تکمیل اولاد کو کبھی فراموش نہیں کرنی چاہیے۔
پروگرام کے اختتام پر بزرگ شہریوں کی گلپوشی کرتے ہوئے انہیں پھل تقسیم کیے گئے۔ اس موقع پر مقررین نے لارڈ اولڈ ایج ہوم کے منتظم ناگارانی نریش کی خدمات کو سراہا، جو اپنے ہی افرادِ خاندان کی جانب سے نظرانداز کیے گئے بزرگوں کو پناہ فراہم کرتے ہوئے انہیں مفت خدمات پیش کر رہے ہیں۔ ان کی سماجی خدمات کے اعتراف میں انہیں تہنیت پیش کی گئی۔
اس پروگرام میں جج پوجیتا، ڈاکٹر انیتا ریڈی، روی، ادارے کے منتظم ناگارانی نریش، سریکانت، ممتا اور اولڈ ایج ہوم کے بزرگوں سمیت دیگر افراد نے شرکت کی۔
**ڈاکٹر انیتا ریڈی**
چیئرپرسن، انوراگ سوسائٹی
رکن، سینئر سٹیزنس ٹریبونل کورٹ
dastoornews.com
۔
